बिना निवण कुण तिरिया भजन लिरिक्स Bina Nivan Kun Tiriya Lyrics -
।। गुरु भजन ।।
आदु – आदु पंथ निवण पद मोटो ,
संगत संतों वाळी करिया रे
साधुभाई ! बिना निवण कुण तिरिया ।
मूळ रे कमल बिच चारों चौकी ,
गणपत आसन धरिया ।
आसण मार इदक होय बैठा ,
जाप अजम्पा जपिया रे
साधुभाई ! बिना निवण कुण तिरिया
पेलो निवण म्हारा मात – पिता ने ,
उत्पुत पालन करिया ।
दूजो निवण इण धरती माता ने ,
जिण पर पगल्या धरिया रे
साधुभाई ! बिना निवण कुण तिरिया
तीजो निवण म्हारे गुरा पीरां ने ,
हृदये उजाळा करिया ।
चौथो निवण इण सतरी संगत ने ,
जिण में आय सुधरिया रे
साधुभाई ! बिना निवण कुण तिरिया ॥
निवण करूं म्हारा ज्योति सरूपी ,
होय इन्दर होलरिया ।
इमरत बूंदां बरसण लागी ,
मान सरोवर भरिया रे
साधुभाई ! बिना निवण कुण तिरिया ।
बिना पाळ भवसागर भरिया ,
गुरु शरणां में उबरिया ।
गुरु शरणे माळी लिखमो जी बोले ,
भूल भरम सब टळिया रे
साधुभाई ! बिना निवण कुण तिरिया