शिव नामावली अष्टक (Shiv Naamavali Ashtakam)

शिव नामावली अष्टक

शिव नामावली अष्टक (Shiv Naamavali Ashtakam: Shivashtak)

।। शिवनामावल्यष्टकम् ।।

हे चन्द्रचूड मदनान्तक शूलपाणे

स्थाणो गिरीश गिरिजेश महेश शम्भो।

भूतेश भीतभयसूदन मामनाथं

संसारदु:खगहनाज्जगदीश रक्ष।।

हे पार्वतीहृदयवल्लभ चन्द्रमौले

भूताधिप प्रमथनाथ गिरीशजाप।

हे वामदेव भव रुद्र पिनाकपाणे

संसारदु:खगहनाज्जगदीश रक्ष।।

हे नीलकण्ठ वृषभध्वज पंचवक्त्र

लोकेश शेषवलयं प्रमथेश शर्व।

हे धूर्जटे पशुपते गिरिजापते मां

संसारदु:खगहनाज्जगदीश रक्ष।।

हे विश्वनाथ शिव शंकर देवदेव

गंगाधर प्रमथनायक नन्दिकेश।

बाणेश्वरान्धकरिपो हर लोकनाथ

संसारदु:खगहनाज्जगदीश रक्ष।।

वाराणसीपुरपते मणिकर्णिकेश

वीरेश दक्षमखकाल विभो गणेश।

सर्वज्ञ सर्वहृदयैकनिवास नाथ

संसारदु:खगहनाज्जगदीश रक्ष।।

श्रीमन् महेश्वर कृपामय हे दयालो

हे व्योमकेश शितिकण्ठ गणाधिनाथ।

भस्मांगराग नृकपालकलापमाल

संसारदु:खगहनाज्जगदीश रक्ष।।

कैलासशैलविनिवास वृषाकपे हे

मृत्युंजय त्रिनयन त्रिजगन्निवास।

नारायणप्रिय मदापह शक्तिनाथ

संसारदु:खगहनाज्जगदीश रक्ष।।

विश्वेश विश्वभवनाशक विश्वरूप

विश्वात्मक त्रिभुवनैकगुणाभिवेश।

हे विश्वबन्धु करुणामय दीनबन्धो

संसारदु:खगहनाज्जगदीश रक्ष।।

गौरीविलासभवनाय महेश्वराय

पंचाननाय शरणागतरक्षकाय।

शर्वाय सर्वजगतामधिपाय तस्मै

दारिद्रयदु:खदहनाय नम: शिवाय।।

।। इति श्रीमच्छंकराचार्य विरचितं शिवनामावल्यष्टकं सम्पूर्णम् ।।

Shiv Naamavali Ashtakam | Uma Mohan | Divine Chants Of Shiva | Maha Shivratri Special Lord Shiva Song