श्रीलक्ष्मीसुप्रभातम् (Shri Lakshmi Suprabhatam | Lakshmi Stotram)

श्रीलक्ष्मीसुप्रभातम्

श्रीलक्ष्मीसुप्रभातम् (Shri Lakshmi Suprabhatam | Lakshmi Stotram)

॥ श्रीलक्ष्मीसुप्रभातम् ॥

मातः प्रसन्नवदनाम्बुजनिर्जिताब्जे

क्षीराब्धिजे सकललोकपवित्रमूर्ते ।

आर्तप्रपन्नजनवन्दितपादपद्मे

श्रीदेवि लक्ष्मि भवतात्तव सुप्रभातम् ॥ १॥

सद्योविकासि कुसुमेषु सुगन्धमत्ताः

गायन्ति मातरमितं भ्रमरा यशस्ते ।

तन्मञ्जुनादपरिबोधितदिव्यदेवि

श्रीदेवि लक्ष्मि भवतात्तव सुप्रभातम् ॥ २॥

स्नात्वामलः सुरगजः सुरदीर्घिकायां

शुण्डोद्धृताब्जविलसद्वदनेन तूर्णम् ।

सन्तिष्ठते गृहमुखे तव भक्तवर्यः

श्रीदेवि लक्ष्मि भवतात्तव सुप्रभातम् ॥ ३॥

शोभां तवैव वदनस्य सदा नवीनां

सम्प्राप्य भानुरिह लोकतमःप्रहन्ता ।

प्राचीं दिशं भजति सोऽपि तवैव भक्तः

श्रीदेवि लक्ष्मि भवतात्तव सुप्रभातम् ॥ ४॥

पद्मानि सन्ति रुचिराणि मनोहराणि

वायुस्तथा वहति मन्दगतिः प्रभाते ।

चेतोहरीह सुषमा प्रकृतेस्तवेयं

श्रीदेवि लक्ष्मि भवतात्तव सुप्रभातम् ॥ ५॥

पूर्वाद्रिसानुशिखरात् समधिष्ठितोऽयं

भानुः क्षणं लसति देवि महाप्रकाशः ।

त्वन्मूर्तिराजीतकिरीटमणिप्रकाशः

श्रीदेवि लक्ष्मि भवतात्तव सुप्रभातम् ॥ ६॥

त्वद्दर्शनार्थमभियान्ति सुरेन्द्रमुख्याः

देवास्त्वदीयपदपङ्कजदत्तचित्ताः ।

आयोज्य तान् लससि कर्मचये त्वमेव 

श्रीदेवि लक्ष्मि भवतात्तव सुप्रभातम् ॥ ७॥

प्रत्यग्रपुष्पनिचयं स्वकरैर्गृहीत्वा

त्वत्पूजनाय मनुजा धृतशुभ्रवस्त्राः ।

आयान्ति मन्दिरमितस्तव भक्तियुक्ताः

श्रीदेवि लक्ष्मि भवतात्तव सुप्रभातम् ॥ ८॥

पद्मप्रिये रुचिरपद्ममुखि स्मितासि

पद्मालये विजितपद्मविभेत्रि तन्वि ।

त्वं पाहि नूनमनिशं जनतां भयार्तेः

श्रीदेवि लक्ष्मि भवतात्तव सुप्रभातम् ॥ ९॥

अम्ब त्वमेव जगतां प्रतिमा रिरिक्षुः

नित्योऽर्पिता लससि शाश्वतधर्मगोप्त्री ।

त्वामाश्रिता जहति दुःखचयं हि भक्ताः

श्रीदेवि लक्ष्मि भवतात्तव सुप्रभातम् ॥ १०॥

मातर्मदीयहृदये सदयं वसाना

मज्जीवनं हि कुरु सार्थकमात्मदीत्या ।

त्वामाश्रितो भवति नैव विपद्भयार्तः

श्रीदेवि लक्ष्मि भवतात्तव सुप्रभातम् ॥ ११॥

त्वं श्रीहरेर्हृदयमेव सदाऽऽश्रितासि

प्रीतिं ततो वहसि लोकशुभाय मातः ।

तत्प्रेममूर्तिरभयं सदयं तनोषि

श्रीदेवि लक्ष्मि भवतात्तव सुप्रभातम् ॥ १२॥

प्रेमप्रफुल्लनयनान्तनरीक्षणेन

श्रीमन् तनोषि जगतां दयया दयाब्धे ।

वात्सल्यमूर्तिरसि सन्तत लोकमाता   

श्रीदेवि लक्ष्मि भवतात्तव सुप्रभातम् ॥ १३॥

त्वन्नेत्रभानुसुविकासितपद्मतल्पो 

भानुश्चकास्ति गगने सतत प्रकाशः ।

नित्यं न भक्तवलिनी जलमध्यभागे

श्रीदेवि लक्ष्मि भवतात्तव सुप्रभातम् ॥ १४॥

मन्दस्मिताङ्कुरविभा कमनीयशोभः

चन्द्रो विभाति रुचिरो नभसि प्रदीप्तः ।

त्वन्मन्दहास इव भाति हि चन्द्रिकेयं

श्रीदेवि लक्ष्मि भवतात्तव सुप्रभातम् ॥ १५॥

त्वन्निर्मलेषु हृदयेषु सदैव रूढा

तत्संपदं च सततं द्विगुणां करोषि ।

सम्पन्नता त्वमसि मङ्गलदेवि मातः

श्रीदेवि लक्ष्मि भवतात्तव सुप्रभातम् ॥ १६॥

आजन्मनः सकललोकविशिष्टवाञ्छाः

सम्पूर्य मोक्षमपि देवि त्वमेव दत्से ।

त्वामाश्रितोऽस्मि वरदायिनि लोकमातः

श्रीदेवि लक्ष्मि भवतात्तव सुप्रभातम् ॥ १७॥

नारायणस्य परिपूर्णमहत्स्वरूपे

नारायणि प्रियतरे कुरु मान्त्रितार्थम् ।

त्वं श्रीहरिप्रियतमासि तदीयचित्ता

श्रीदेवि लक्ष्मि भवतात्तव सुप्रभातम् ॥ १८॥

नेत्राञ्चलप्रणयवर्षणमत्तचित्तो

नारायणस्तव सदा रमते हृदब्जे ।

तत्प्रेममूर्तिरसि देवि सदैव मातः

श्रीदेवि लक्ष्मि भवतात्तव सुप्रभातम् ॥ १९॥

पश्यात्र देवि मुनिलोकमविप्रपन्नं

श्रीसूक्तमन्त्रजपकोटिपवित्रचित्तम् ।

पायात्तमुग्रतपसं तव भक्तिपूतं

श्रीदेवि लक्ष्मि भवतात्तव सुप्रभातम् ॥ २०॥

पृथ्वी-जलं-तपन-वायु-नभांसि चापि

त्वामाश्रितानि खलु कर्म सुशक्तिकानि ।

सर्वं तवैव महिमेति श्रुति समित्ते

श्रीदेवि लक्ष्मि भवतात्तव सुप्रभातम् ॥ २१॥

श्रुत्यन्तमूर्त्मिनतमानसपद्मपूगे

फुल्लारविन्दनिचये च शिशोश्च हासे ।

त्वं निर्मले वससि देवि सदैव चित्ते

श्रीदेवि लक्ष्मि भवतात्तव सुप्रभातम् ॥ २२॥

लक्ष्मि स्वयं वससि शुद्धधनेऽत्र लोके

धान्ये तथैव विजये स्वपराक्रमाप्ते ।

ज्ञाने च शान्तिसहिते परिपूर्णरूपे

श्रीदेवि लक्ष्मि भवतात्तव सुप्रभातम् ॥ २३॥

सायन्तने वससि निर्मलगोसमूहे

वत्सप्रिये शिशुषु दोहनकर्मसक्ते ।

दुग्धेऽपिगोरिहसता परिपोषरूपा

श्रीदेवि लक्ष्मि भवतात्तव सुप्रभातम् ॥ २४॥

त्वं पर्वतेषु परिरम्यशिखिस्थलेषु

पुष्पादिकेषु निबिडेषु वनस्थलेषु ।

मन्दाकिनीषु तटिनीषु जलस्थलेषु

श्रीदेवि लक्ष्मि भवतात्तव सुप्रभातम् ॥ २५॥

प्राणादि संयमपरेषु सदा हृदन्ते

नारायणस्पृतिपरेषु च मानवेषु ।

मातः सदा लससि बोधमहत्स्वरूपा

श्रीदेवि लक्ष्मि भवतात्तव सुप्रभातम् ॥ २६॥

त्वामाश्रितो जगति पुण्यफलं समस्तं

सम्प्राप्नुते तदनुमोक्षपदं तथान्ते ।

त्वामाश्रितश्च मधुसूदनमाश्रितः सन्

श्रीदेवि लक्ष्मि भवतात्तव सुप्रभातम् ॥ २७॥

सम्प्रत्यहो मनुजबुद्धिरतीव दुष्टा

सम्पत्फलाय कुरुते खलु दुष्टयत्ना ।

संस्कार्य ताञ्च जननीव समुद्धरेस्त्वं

श्रीदेवि लक्ष्मि भवतात्तव सुप्रभातम् ॥ २८॥

न त्वां विना मनुजजन्मफलं जगत्यां

संप्राप्नुयां हि सकलं विकला स्वशक्त्या । 

तस्मात्त्वमेव परिपाहि दयां कुरुष्व

श्रीदेवि लक्ष्मि भवतात्तव सुप्रभातम् ॥ २९॥

मधुमथनकटाक्षप्रेमभाण्डाररूपा

सकलविमलसम्पद्वृद्धिरूपा च लक्ष्मीः ।

लसतु मम हृदब्जे पूर्णबोधात्मना सा

दिशतु च भुवि सर्वं योग्यमात्यन्तिकं च ॥ ३०॥

Shri Lakshmi Suprabhatam | श्रीलक्ष्मीसुप्रभातम् | Lakshmi Stotram | Diwali Bhajan

Singer: Amrita Chaturvedi Upadhyay

Lyrics: Adi Shankaracharya

Music: Rohit Kumar (Bobby)