 |
| वैकृतिकं रहस्यम्: श्रीदुर्गासप्तशती |
वैकृतिकं रहस्यम्: श्रीदुर्गासप्तशती (Vaikritikam Rahasyam: Shree Durga Saptashati)
॥ अथ वैकृतिकं रहस्यम् ॥
ऋषिरुवाच
ॐ
त्रिगुणा तामसी देवी सात्त्विकी या त्वयोदिता ।
सा शर्वा चण्डिका दुर्गा भद्रा भगवतीर्यते ॥
योगनिद्रा हरेरुक्ता महाकाली तमोगुणा ।
मधुकैटभनाशार्थं यां तुष्टावाम्बुजासनः ॥
दशवक्त्रा दशभुजा दशपादाञ्जनप्रभा ।
विशालया राजमाना त्रिंशल्लोचनमालया ॥
स्फुरद्दशनदंष्ट्रा सा भीमरूपापि भूमिप ।
रूपसौभाग्यकान्तीनां सा प्रतिष्ठां महाश्रियः॥
खड्गबाणगदाशूलशङ्खचक्रभुशुडिभृत् ।
परिघं कार्मुकं शीर्षं निश्चोतद्रुधिरं दधौ ॥
एषा सा वैष्णवी माया महाकाली दुरत्यया ।
आराधिता वशीकुर्यात्पूजाकर्तुश्चराचरम् ॥
सर्वदेवशरीरेभ्यो याऽऽविर्भूतामितप्रभा ।
त्रिगुणा सा महालक्ष्मीः साक्षान्महिषमर्दिनी ॥
श्वेतानना नीलभुजा सुश्वेतस्तनमण्डला ।
रक्तमध्या रक्तपादा रक्तजङ्घोरुरुन्मदा ॥
सुचित्रजघना चित्रमाल्याम्बरविभूषणा ।
चित्रानुलेपना कान्तिरूपसौभाग्यशालिनी ॥
अष्टादशभुजा पूज्या सा सहस्रभुजा सती ।
आयुधान्यत्र वक्ष्यन्ते दक्षिणाधःकरक्रमात् ॥
अक्षमाला च कमलं बाणोऽसिः कुलिशं गदा ।
चक्रं त्रिशूलं परशुः शङ्खो घण्टा च पाशकः ॥
शक्तिर्दण्डश्चर्म चापं पानपात्रं कमण्डलुः ।
अलङ्कृतभुजामेभिरायुधैः कमलासनाम् ॥
सर्वदेवमयीमीशां महालक्ष्मीमिमां नृप ।
पूजयेत्सर्वलोकानां स देवानां प्रभुर्भवेत् ॥
गौरीदेहात्समुद्भूता या सत्त्वैकगुणाश्रया ।
साक्षात्सरस्वती प्रोक्ता शुम्भासुरनिबर्हिणी ॥
दधौ चाष्टभुजा बाणमुसले शूलचक्रभृत् ।
शङ्खं घण्टां लाङ्गलं च कार्मुकं वसुधाधिप ॥
एषा सम्पूजिता भक्त्या सर्वज्ञत्वं प्रयच्छति ।
निशुम्भमथिनी देवी शुम्भासुरनिबर्हिणी ॥
इत्युक्तानि स्वरूपाणि मूर्तीनां तव पार्थिव ।
उपासनं जगन्मातुः पृथगासां निशामय ॥
महालक्ष्मीर्यदा पूज्या महाकाली सरस्वती ।
दक्षिणोत्तरयोः पूज्ये पृष्ठतो मिथुनत्रयम् ॥
विरञ्चिः स्वरया मध्ये रुद्रो गौर्या च दक्षिणे ।
वामे लक्ष्म्या हृषीकेशः पुरतो देवतात्रयम् ॥
अष्टादशभुजा मध्ये वामे चास्या दशानना ।
दक्षिणेऽष्टभुजा लक्ष्मीर्महतीति समर्चयेत् ॥
अष्टादशभुजा चैषा यदा पूज्या नराधिप ।
दशानना चाष्टभुजा दक्षिणोत्तरयोस्तदा ॥
कालमृत्यू च सम्पूज्यौ सर्वारिष्टप्रशान्तये ।
यदा चाष्टभुजा पूज्या शुम्भासुरनिबर्हिणी ॥
नवास्याः शक्तयः पूज्यास्तदा रुद्रविनायकौ ।
नमो देव्या इति स्तोत्रैर्महालक्ष्मीं समर्चयेत् ॥
अवतारत्रयार्चायां स्तोत्रमन्त्रास्तदाश्रयाः ।
अष्टादशभुजा चैषा पूज्या महिषमर्दिनी ॥
महालक्ष्मीर्महाकाली सैव प्रोक्ता सरस्वती ।
ईश्वरी पुण्यपापानां सर्वलोकमहेश्वरी ॥
महिषान्तकरी येन पूजिता स जगत्प्रभुः ।
पूजयेज्जगतां धात्रीं चण्डिकां भक्तवत्सलाम् ॥
अर्घादिभिरलङ्कारैर्गन्धपुष्पैस्तथाक्षतैः ।
धूपैर्दीपैश्च नैवेद्यैर्नानाभक्ष्यसमन्वितैः ॥
रुधिराक्तेन बलिना मांसेन सुरया नृप ।
प्रणामाचमनीयेन चन्दनेन सुगन्धिना ॥
सकर्पूरैश्च ताम्बूलैर्भक्तिभावसमन्वितैः ।
वामभागेऽग्रतो देव्याश्छिन्नशीर्षं महासुरम् ॥
पूजयेन्महिषं येन प्राप्तं सायुज्यमीशया ।
दक्षिणे पुरतः सिंहं समग्रं धर्ममीश्वरम् ॥ ३०॥
वाहनं पूजयेद्देव्या धृतं येन चराचरम् ।
कुर्याच्च स्तवनं धीमांस्तस्या एकाग्रमानसः॥
ततः कृताञ्जलिर्भूत्वा स्तुवीत चरितैरिमैः।
एकेन वा मध्यमेन नैकेनेतरयोरिह॥
चरितार्धं तु न जपेज्जपञ्छिद्रमवाप्नुयात्।
प्रदक्षिणानमस्कारान् कृत्वा मूर्ध्नि कृताञ्जलिः॥
क्षमापयेज्जगद्धात्रीं मुहुर्मुहुरतन्द्रितः।
प्रतिश्लोकं च जुहुयात्पायसं तिलसर्पिषा॥
जुहुयात्स्तोत्रमन्त्रैर्वा चण्डिकायै शुभं हविः।
भूयो नामपदैर्देवीं पूजयेत्सुसमाहितः॥
प्रयतः प्राञ्जलिः प्रह्वः प्रणम्यारोप्य चात्मनि।
सुचिरं भावयेदीशां चण्डिकां तन्मयो भवेत्॥
एवं यः पूजयेद्भक्त्या प्रत्यहं परमेश्वरीम्।
भुक्त्वा भोगान् यथाकामं देवीसायुज्यमाप्नुयात्॥
यो न पूजयते नित्यं चण्डिकां भक्तवत्सलाम्।
भस्मीकृत्यास्य पुण्यानि निर्दहेत्परमेश्वरी॥
तस्मात्पूजय भूपाल सर्वलोकमहेश्वरीम्।
यथोक्तेन विधानेन चण्डिकां सुखमाप्स्यसि॥
ॐ
॥ इति वैकृतिकं रहस्यं सम्पूर्णम् ॥
देवी माहात्म्यम् / दुर्गा सप्तशती -
- देवी माहात्म्यम्
- दुर्गा सप्तशती
- सप्तश्लोकी दुर्गा: श्रीदुर्गासप्तशती
- श्रीदुर्गासप्तशती: श्रीदुर्गाष्टोत्तरशतनामस्तोत्रम्
- देवी माहात्म्यम्: श्री दुर्गा कवच
- श्रीदुर्गासप्तशती - अर्गलास्तोत्रम्
- देवी माहात्म्यं - श्रीदुर्गासप्तशती: अर्गला स्तोत्रम्
- श्रीदुर्गासप्तशती - कीलकम् स्तोत्रम्
- देवी माहात्म्यं दुर्गा सप्तशति प्रथमोऽध्यायः
- देवी माहात्म्यं नवावर्ण विधि
- देवी माहात्म्यं दुर्गा सप्तशति द्वितीयोऽध्यायः
- देवी माहात्म्यं दुर्गा सप्तशति तृतीयोऽध्यायः
- देवी माहात्म्यं दुर्गा सप्तशति चतुर्थोऽध्यायः
- देवी माहात्म्यं दुर्गा सप्तशति पञ्चमोऽध्यायः
- देवी माहात्म्यं दुर्गा सप्तशति षष्ठोऽध्यायः
- देवी माहात्म्यं दुर्गा सप्तशति सप्तमोऽध्यायः
- देवी माहात्म्यं दुर्गा सप्तशति अष्टमोऽध्यायः
- देवी माहात्म्यं दुर्गा सप्तशति नवमोऽध्यायः
- देवी माहात्म्यं दुर्गा सप्तशति दशमोऽध्यायः
- देवी माहात्म्यं दुर्गा सप्तशति एकादशोऽध्यायः
- देवी माहात्म्यं दुर्गा सप्तशति द्वादशोऽध्यायः
- देवी माहात्म्यं दुर्गा सप्तशति त्रयोदशोऽध्यायः
- देवी माहात्म्यं दुर्गा द्वात्रिंशन्नामावलि
- देवी माहात्म्यं मङ्गल नीराजणम्
- देवी माहात्म्यं चामुण्डेश्वरी मङ्गलम्
- श्री महाकाली स्तोत्रं
- श्रीदुर्गासप्तशती - वेदोक्तं रात्रिसूक्तम्
- श्रीदुर्गासप्तशती - तन्त्रोक्तं रात्रिसूक्तम्
- श्रीदुर्गासप्तशती - श्रीदेव्यथर्वशीर्षम्
- श्रीदुर्गासप्तशती - श्रीदुर्गामानस पूजा
- श्रीदुर्गासप्तशती - मूर्तिरहस्यम्
- श्रीदुर्गासप्तशती - वैकृतिकं रहस्यम्
- श्रीदुर्गासप्तशती - प्राधानिकं रहस्यम्
- श्रीदुर्गासप्तशती - तन्त्रोक्तं देवीसूक्तम्
- श्रीदुर्गासप्तशती - ऋग्वेदोक्तं देवीसूक्तम्
- श्रीदुर्गासप्तशती - क्षमा प्रार्थना स्तोत्रम्
- दुर्गा सप्तशती: सिद्धकुञ्जिकास्तोत्रम्
- देवी माहात्म्यं - अपराध क्षमापणा स्तोत्रम्
Vaikritikam Rahasyam | Shree Durga Saptashati | Navratri Durga Paath
Singer: Amrita Chaturvedi UpadhyayLyrics: Traditional (Version: Shree Durga Saptashati, Gita Press)
Music: Rohit Kumar (Bobby)
Flute: Pt. Ajay Shankar Prasanna